वडाअध्यक्षको निरन्तर प्रयासपछि सितलपुरले पायो शुद्ध खानेपानीको आशा
माघ २१ गते राम प्रवेश बैठा
रौतहटको फतुवा विजयपुर नगरपालिका–२, सितलपुरमा ओभरहेड ट्यांकी निर्माण कार्य सुरु भएसँगै अब स्थानीयवासीले शुद्ध तथा सुरक्षित खानेपानी पाउने आशा पलाएको छ । लामो समयदेखि खानेपानीको समस्या भोग्दै आएका सितलपुरवासीका लागि यो योजना महत्वपूर्ण उपलब्धि हुने अपेक्षा गरिएको छ ।
जानकारी अनुसार संघीय सरकारबाट यस योजनाका लागि ९० लाख रुपैयाँ बजेट विनियोजन गरिएको छ । चालू आर्थिक वर्षभित्रै निर्माण कार्य सम्पन्न गरी स्थानीयलाई सेवा दिन लक्ष्य लिइएको छ ।
स्थानीय जनप्रतिनिधिहरूका अनुसार वडा अध्यक्ष **अनिरूद्व यादव (सञ्जय)**को निरन्तर पहल र प्रयासका कारण यो योजना अघि बढेको हो । वडा अध्यक्ष यादवले खानेपानीसँगै शिक्षा, कृषि तथा पूर्वाधार विकासका क्षेत्रमा पनि सक्रिय भूमिका निर्वाह गर्दै आएका छन् ।
सितलपुरमा विकासका योजनाहरू क्रमशः अघि बढ्दै गएपछि स्थानीयवासीले आफ्नो जीवनस्तर उकासिने विश्वास व्यक्त गरेका छन् । साथै, योजनाको काम गुणस्तरीय र समयमै सम्पन्न गर्न सबै पक्षको निगरानी र सहकार्य आवश्यक रहेको स्थानीयहरूको भनाइ छ ।
