फतुवा विजयपुरमा मातृस्वास्थ्यका लागि सराहनीय पहल, गर्भवती र सुत्केरी महिलालाई पोषणयुक्त खाद्यान्न वितरण
साउन १४ गते
रौतहटको फतुवा विजयपुर नगरपालिकामा आज एक महत्वपूर्ण जनकल्याणकारी कार्यक्रम सम्पन्न भएको छ, जसअन्तर्गत गर्भवती तथा सुत्केरी महिलालाई पोषणयुक्त खाद्यान्न वितरण गरिएको छ। मातृ तथा शिशु स्वास्थ्यमा विशेष प्राथमिकता दिँदै सञ्चालन गरिएको उक्त कार्यक्रमले स्थानीय महिला समुदायमा आशा र राहत दुबै प्रदान गरेको छ।
स्वास्थ्य मन्त्रालय, मधेस प्रदेश सरकार अन्तर्गतको स्वास्थ्य निर्देशनालयको सहयोगमा, नेपाली कांग्रेसका युवा नेता तथा महाधिवेशन प्रतिनिधि ज्ञानेन्द्र प्रसाद यादवको पहलमा कार्यक्रम सम्पन्न भएको हो।
कार्यक्रमको प्रमुख आतिथ्य कार्यवाहक नगरप्रमुख अम्बेया खातुनले ग्रहण गर्नु भएको थियो। खातुनका अनुसार वडा नम्बर १ देखि ११ सम्मका गर्भवती तथा सुत्केरी महिलालाई लक्षित गर्दै पोषणयुक्त खाद्यान्न वितरण गरिएको हो। कार्यक्रममा स्थानीय आमाहरूको उल्लेख्य सहभागिता रहेको थियो, जसले सामग्री प्राप्तिपछि धन्यवाद व्यक्त गरेका छन्।
कार्यवाहक नगरप्रमुख खातुनले भनिन्, “मातृ तथा शिशु स्वास्थ्यको सुधार हाम्रो प्राथमिकता हो। स्थानीय सरकार र प्रदेश सरकारबीचको सहकार्यले यस्ता कार्यक्रमलाई थप प्रभावकारी बनाउनेछ।”
नेता ज्ञानेन्द्र यादवले कुपोषणको जोखिममा रहेका महिलाहरूको अवस्था बुझेर तत्काल राहत दिनका लागि यो कार्यक्रम ल्याइएको स्पष्ट पार्नुभयो। उहाँले भविष्यमा अझ व्यवस्थित र दीर्घकालीन योजना ल्याउने प्रतिबद्धता जनाउनुभयो।
स्थानीय नेतृत्व र सरकारबीचको समन्वयले मातृ तथा बालस्वास्थ्यमा सार्थक परिवर्तन ल्याउने अपेक्षा गरिएको छ।
